بہ قلم: مولوی کفیل احمد میواتی
معین مدرس دار العلوم دیوبند
جس طرح ایک انسان ، بچپن ، جوانی ، کہولت اور بڑھاپے جیسے مختلف ادوار سے گذرتا ہے ، اسی طرح ہر علم و فن پر مختلف ادوار آتے ہیں، علم نحو بھی ان ادوار سے یقینا گذرا ہے اور علمائے نحو کے بھی متعدد طبقات ہیں جنہیں صاحبِ ”اخبارالنحویین البصریین“ قاضی ابو سعید سیرافی(م۳۶۸ھ)، صاحبِ ”مراتب النحویین“ ابو طیب عبد الواحدلغوی (م۳۵۱ھ)،صاحبِ ”طبقات النحاة واللغویین“ قاضی ابن تقی الدین ابنِ شہبہ(م۸۵۱ھ)، صاحبِ ”نزھة الالباء فی طبقات الادباء“ ابو البرکات انباری (م۵۷۷ھ)، صاحبِ ”طبقات فحول الشعراء“ محمد بن سلام اور صاحبِ ”طبقات النحویین واللغویین“ محمد بن حسن زبیدی (م۳۷۹ھ)جیسے علماء نے بیان بھی کیا ہے ؛ لیکن حقیقت یہ ہے کہ طبقات محدثین و فقہاء کی طرح طبقات نحات کی خدمت نہیں ہوئی ہے، جس طرح فقہا کا ہر طبقہ متعین ہے، طبقات کی تعداد بھی متعین ہے، پھر متقدمین ومتاخرین کی بھی واضح تعیین موجود ہے؛ اس طرح کی تحدید طبقاتِ نحات میں نہیں ہے، حتی کہ اس بات کی بھی واضح تعیین نہیں ملتی کہ نحاتِ متاخرین کی ابتداء کس شخصیت سے ہوتی ہے؟ جیسا کہ شیخ احمد طنطاوی نے بھی اپنی کتاب ”نشاة النحوو تاریخ أشہر النحاة“ میں اس حقیقت کی طرف اشارہ فرمایا ہے ۔(۱)
تاہم متاخرین کی ابتداء کے سلسلے میں اتنا تو طے ہے کہ بغدادی مکتب ِفکر(۲)کے زوال سے پہلے تک متقدمین کا دور مانا جاتا ہے، اس کے بعد متاخرین کا دور شروع ہوتا ہے اور بغدادی مکتب فکر ، درستویہ (م۳۴۷ھ)، ابو بکر ابن الانباری (م۳۲۸ھ)، نفطویہ (م۳۲۳ھ)، مبرمان (م۳۴۵ھ)، زجاجی(م۳۲۵ھ)اور ابن کیسان (م۲۲۹ھ)وغیرہ پر ختم ہوجاتا ہے(۳)، یہ نحات متقدمین کا آخری ٹولہ ہے۔
متاخرین کی ابتداء شیخ ابو علی فارسی ، ابن خالویہ اور ان کے ہم عصر علماء سے ہوتی ہے، گویا چوتھی صدی ہجری کے اواخر سے متاخرین کا زمانہ شمار کیا جاتا ہے، اس کی تائید میں علامہ رضی الدین استرابادی کی ایک عبارت بطور دلیل پیش کی جاتی ہے، وہ شرح الکافیہ ، بابِ اسم مفعول میں فرماتے ہیں:
” متقدمین کے کلام میں ایسی کوئی چیز نہیں ملتی ، جس سے یہ معلوم ہو کہ اسم مفعول کے عمل کرنے کے لیے اس کا حال یا استقبال کے معنیٰ میں ہونا شرط ہے؛ لیکن متاخرین جیسے ابو علی اور ان کے بعد کے حضرات نے صراحتاً اسم فاعل کی طرح ، اسم مفعول کے اعمال کے لیے بھی حال یا استقبال کی شرط لگائی ہے۔“
بہر حال علماء نحو کے طبقات و تراجم مختلف طرح سے بیان کیے گیے ہیں۔ہم تدوین فن نحو سے لے کر اب تک کے علما کو درج ذیل خطوط پر بیان کریں گے:
نحات کی اولاً دوقسمیں ہیں:
(۱) متقدمین (۲)متاخرین
عام طور پر یہ خیال کیا جاتا ہے کہ متقدمین نحات کا اطلاق بصریہ اور کوفیہ پر ہوتا ہے؛لیکن ایسا نہیں ہے؛ بلکہ متقدمین میں بغداد، مصر، شام اور اندلس وغیرہ کے علمائے نحات بھی شمار ہوتے ہیں اگر چہ وہ متقدمین کا آخری دور ہے ، اس کی تفصیل کچھ اس طرح ہے:
متقدمین کے چار دور :
فن نحو کے ابتدائی مر حلے کو چار ادوار میں تقسیم کیا جاتا ہے:
(۱) طور الوضع والتکوین،اس میں خالص بصری مکتب فکر کا حصہ ہے۔
(۲)طور النشأ والنمو،اس میں بصری اور کوفی دونوں مکاتب فکر کا کردار رہاہے۔
(۳)طور النضج والکمال،اس میں بھی کوفی اور بصری دونوں مکاتب فکر کی حصہ داری رہی ہے۔
(۴)طورالترجیح،اس مرحلے میں بغداد نے نمایاں خدمات انجام دی ہیں اگر چہ اس مرحلے میں اندلسی، مصری اور شامی نحات کا بھی حصہ رہا ہے۔ یہ فن نحو کا سنہرا دور رہا ہے جس میں خوب تصانیف ہوئی ہیں۔
فن نحو کے چار ادوار
ان ادوار کو دو اور دو چار کی طرح متعین کرنا مشکل ہے؛ اس لیے کہ ایسی چیزوں میں اختلاف رہتا ہی ہے، تاہم پہلا دور ابوالاسود دولی کے زمانے سے امام خلیل بن احمد فراہیدی تک ہے جس میں فن نحو کے خطوط و معالم وضع ہوئے۔ اس دور کے اعلام میں عنبسہ بن معدان الفیل، نصر بن عاصم لیثی، عبدالرحمن بن ہرمز اور یحی بن یعمر وغیرہ کا شمار ہوتا ہے۔
دوسرے مرحلے کا دورانیہ پہلے سے ذرا زیادہ ہے،جو بصریہ میں امام خلیل کے بعد سے امام مازنی تک اور کوفیہ میں ابوجعفر رواسی سے ابن سکیت تک ہے۔یہ فن نحو کی ترقی کا دور ہے،اس میں خوب تصانیف ہوئیں ہیں، قرآن النحو الکتاب لسیبویہ بھی اسی دور میں لکھی گئی،اس میں کوفیہ اور بصریہ دونوں مکاتب فکر کے درمیان منافست اور مقابلہ آرائی رہتی تھی۔
تیسرا دور بصریہ میں امام مازنی سے امام مبردتک اور کوفیہ میں امام یعقوب ابن سکیت سے امام ثعلب کوفی تک ہے۔اسے فن نحو کا سنہری دور کہنا چاہیے۔ اس دور میں کوفیہ اور بصریہ کے درمیان مباحثے اور مناظرے بھی ہوتے تھے؛چنانچہ امام کسائی،امام ثعلب کوفی،امام سیبویہ،امام اصمعی،یحییٰ بن مبارک یزیدی اس دور کے کے نمایاں مناظر ہیں۔ جن پرفن نحو میں اجتہاد ختم ہو جاتا ہے اور بصریہ، کوفیہ دونوں مکاتب فکر کی روشنی مدھم پڑنے لگتی ہے اور فن نحو بصرہ اور کوفہ سے بغداد منتقل ہوتا ہے؛ اس کے بعد چوتھا دور شروع ہوتا ہے۔
اس دورکا سرخیل بغداد شمار ہوتا ہے،اگرچہ اس میں مصر، شام اور اندلس وغیرہ کی خدمات بھی کم نہیں رہی ہیں۔یہ دور ابن درستویہ،ابن انباری،ابو سعید سیرافی اور نفطویہ تک مانا جاتا ہے ،اس میں ترجیح مذاہب، تنقیح مباحث اور تشریح مسائل پر زور رہاجس کے نتیجے میں فن نحو کے کتب خانے کو مزید وسعت ملی۔
ذیل میں متقدمین کو مختلف مکاتبِ فکر (بصریہ، کوفیہ، بغدادیہ وغیرہ)میں تقسیم کرکے طبقہ وار ذکر کریں گے ۔
متقدمین کا زمانہ آل بویہ کی حکومت قائم ہونے سے پہلے تک ہے اس کے بعد متا خرین نحات کا دور شروع ہوتا ہے جس کے دو بڑے حصے ہیں :(۱)عہد اسلامی ، جس میں حکومت بنی بویہ سے سقوط بغداد تک کے نحات آتے ہیں۔ (۲)سقوط بغداد کے بعد کا زمانہ ، جس میں ۶۵۶ھ سے لے کر اب تک کے علمائے نحو آتے ہیں؛ چناں چہ متاخرین کی تفصیل کچھ اس طرح ہوگی :
متأخرین:
عہد اسلامی میں :۳۳۴ھ میں بنو بویہ کی حکومت قائم ہونے سے ۶۵۶ھ (سقوطِ بغداد )تک کا زمانہ ۔ اس کو تین حصوں میں بیان کریں گے:
نحات عراق نحات مصر و شام ، نحات اندلس و مغرب
(۲)۵۶۵ھ (سقوط بغداد )سے لے کر اب تک کا زمانہ ۔ اس کو پانچ حصوں میں بیان کریں گے :
نحات مشرق، نحات ِ اندلس و مغرب
نحات مصر و شام (۶۴۸ھ کے بعد یعنی عہد ممالیک میں ۔)
نحات مصر و شام (۹۳۳ھ کے بعد سے یعنی ترکی عہد میں )
نحات ہند :نحاتِ متحدہ ہندوستان یعنی جنوبی ایشیا کو سن وار ذکر کریں گے۔
متقدمین
بصریین
طبقہٴ اولیٰ:
(۱)ابو الاسود الدولی م ۶۹ھ (۲)عبد الرحمن بن ہرمز (ابوداود) م ۱۱۷ ھ
طبقہٴ ثانیہ :
(۳)نصر بن عاصم اللیثی م ۸۹ھ (۴)یحی بن یعمر م ۱۲۹ھ
(۵)عنبسة بن الفیل م ۱۰۰ھ (۶)میمون اقرن
طبقہٴ ثالثہ:
(۷)ابن ابی عقرب (معاویہ بن عمر الدیلمی ) (۸)عبداللہ بن ابی اسحاق حضرمی م ۱۱۷ھ
طبقہٴ رابعہ :
(۹)ابو عمر و بن العلاء م ۱۵۴ھ (۱۰)ابو سفیان بن العلاء ، م ۱۶۵ھ
(۱۱)الاخفش الکبیر (عبد الحمید بن عبد الحمید ) م ۱۵۷ھ (۱۲)عیسی بن عمر ثقفی، م ۱۴۹ھ
(۱۳)مَسْلمہ بن عبد اللہ (۱۴)بکر بن حبیب السہمی م ۸۸ھ
طبقہ خامسہ:
(۱۵)خلیل بن احمد فراہیدی م ۱۷۴ھ (۱۶)حماد بن سلمہ م ۱۶۹ھ
(۱۷)یونس بن حبیب م ۱۸۳ھ (۱۸)یعقوب بن اسحاق حضرمی م ۲۰۵ھ
(۱۹)ابو عاصم بن نبیل (ضحاک بن مخلد)م ۲۱۲ھ
طبقہ سادسہ:
(۲۰ )نضر بن شمیل بن خر شہ م ۲۰۳ھ
(۲۱)ابو محمد یزیدی (یحی بن مبارک ) م ۲۰۲ھ
(۲۲)سیبویہ (عمر و بن عثمان بن قَنبَر) م ۱۸۰ھ
(۲۳)اخفش ا وسط (ابو الحسن سعید بن مسعدہ) م ۲۱۵ھ
(۲۴)ابو عمر جرمی (صالح بن عمر )م ۲۲۵ھ (۲۵)علی بن نصر جہضمی م ۱۸۷ھ
(۲۶)مورج بن عمرو سدوسی م ۱۹۵ھ (۲۷)محمد بن ابی محمدیزیدی
(۲۸)ابو جعفر احمد بن محمد بن ابی محمد یزیدی (۲۹)فضل بن محمد بن ابی محمد یزید (ابو العباس)
طبقہ سابعہ :
(۳۰)ابو عثمان مازنی (بکر بن محمد بن عثمانی )م۲۴۹ھ
(۳۱)ابوحاتم سجستانی (سہل بن محمد ) م ۲۵۵ھ
(۳۲)ریاشی (عباس بن الفرج)م ۲۵۷ھ
(۳۳)زیادی (ابراہیم بن سفیان ) م ۲۴۹ھ
(۳۴)توزی (عبد اللہ بن محمد) م ۲۳۰ھ
(۳۵)قطرب (محمد بن مستنیر)م ۲۰۶ھ
طبقہ ثامنہ :
(۳۶)ابو العباس مبرد (محمد بن یزید ) م ۲۸۵ھ
(۳۷)باہلی (ابو العلاء محمد بن ابی زرعہ) م ۲۵۷ھ
طبقہ تاسعہ:
امام مبرد کے تلامذہ :
(۳۸)ابو اسحاق الزجاج (ابراہیم بن السری بن سہل ) م ۳۱۱ھ
(۳۹)محمد بن سرّاج م ۳۱۶ھ
(۴۰)مبرمان (ابو بکر محمد بن علی بن اسماعیل عسکری) م ۳۴۵ھ
(۴۱)الفزاری (ابو زرعہ فزاری)
(۴۲)اخفش صغیر (علی بن سلیمان ) م ۳۱۵ھ
(۴۳)ابن درستویہ (عبداللہ بن جعفر) م۳۴۷ھ
(۴۴)ابو بکر محمد بن شقیر نحوی م ۳۱۷ھ
(۴۵)ابن الخیاط (احمد بن محمد بن منصور )م ۳۲۰ھ
طبقہ عاشرہ :
زجاج نحوی کے تلامذہ:
(۴۶)ابو الفہد بصری (۴۷)ابو القاسم زجاجی(عبدالرحمن بن اسحاق)م۳۳۷ھ
ابن السّراج نحوی کے تلامذہ :
(۴۸)ابو سعید سیرافی (حسن بن عبداللہ بن مرزُبان)م۳۶۸ھ
(۴۹)ابو علی الفَسَوِی فارسی (الحسن بن احمد بن عبد الغفار)م۳۷۷ھ
(۵۰)علی بن عیسی بغدادی ورّاق رُمّانی م۳۸۴ھ
اخفش صغیر (علی بن سلیمان)کے تلامذہ:
(۵۱)میدمی
ابن درستویہ کے تلامذہ:
(۵۲)ابو طاہر (عبد اللہ بن عمر بن محمد بن ابی ہاشم مقری)م۳۴۴ھ
(۵۳)کرمانی (محمد بن عبداللہ ) (۵۴)ابو علی (اسماعیل بن قاسم بغدادی)
کوفیین
طبقہ اولیٰ:
(۵۵)رواسی (محمد بن الحسن بن ابی سارة)م۱۸۷ھ
(۵۶)معاذ الہراء (معاذ بن مسلم ہروی)م۱۸۷ھ
(۵۷)ابو مسلم (اتالیق عبد الملک بن مروان )
طبقہ ثانیہ:
(۵۸)کسائی م ۱۸۹ھ
طبقہ ثالثہ:
(۵۹)فرا ء (یحی بن زیاد بن عبد اللہ بن منصور )م۲۰۷ھ
(۶۰)القاسم بن معن م۱۷۵ھ یا ۱۸۷ھ
(۶۱)الاحمر (علی بن مبارک)م۱۹۴ھ (۶۲)ہشام بن معاویہ القریر م۲۰۹ھ
(۶۳)ابو طالب المکفوف (۶۴)سلمویہ
(۶۵)اسحاق بغوی (۶۶)ابو مسحل (عبد اللہ بن حریش)
(۶۷)قتیبہ النحوی
طبقہ رابعہ :
امام فراء کے تلامذہ:
(۶۸)مسلمہ بن عاصم م ۲۷۰ھ کے بعد (۶۹)ابو عبد اللہ الطوال م ۲۴۳ھ
(۷۰)محمد بن قادم (احمد بن عبد اللہ بن قادم )م ۲۵۱ھ
(۷۱)ابن سعدان (محمد بن سعدان )م ۲۳۱ھ (۷۲)محمد بن حبیب م۲۴۵ھ
طبقہ خامسہ:
سلمہ بن عاصم کے تلامذہ:
(۷۳)احمد بن یحی ثعلب م ۲۹۱ھ
طبقہ سادسہ:
ثعلب کوفی کے تلامذہ
(۷۴)ہارون بن حائک (حائل)م ۳۴۴ھ
(۷۵)ابو موسی حامض (محمد بن سلمان )م۳۰۵ھ
(۷۶)معبدی (احمد بن عبد اللہ )
(۷۷)ابن کیسان (محمد بن احمد )م ۲۹۹ھ
(۷۸)ابو بکر بن انباری (محمد بن قاسم)م ۳۲۸ھ
(۷۹)نفطو یہ (ابراہیم بن محمد بن عرفہ بن سلیمان )م ۳۲۳ھ
نُحاتِ مصر:
(۸۰)ولید بن تمیمی (ولّاد) م ۲۶۳ھ (۸۱)ابو علی الدینوری م ۲۸۹ھ
(۸۲)محمد بن ولید تمیمی (ابن ولاد) م ۲۹۸ھ
(۸۳)احمد بن محمد بن ولیدبن محمد تمیمی(ابن ولّاد ثانی)۳۳۲ھ
(۸۴)احمد بن محمد مصری (ابو جعفر نحاس) م۳۷۷ھ
متأخرین
نحات عراق و مضافات:
(۸۵)حسین بن محمد (ابن خالویہ ) م۳۷۰ھ
(۸۶)عثمان بن جنی (ابن جنیّ) م ۳۹۲ھ
(۸۷)علی بن عیسی (ربعی) م ۵۲۰ھ
(۸۸)عبد الواحد بن علی (ابن برہان عبکری) م ۴۵۶ھ
(۸۹)یحی بن علی تبریزی (تبریزی) م ۵۰۲ھ
(۹۰)حسن بن صافی (ملک النحاة ) م ۵۶۸ھ
(۹۱)محمود بن عمر جار اللہ (زمخشری) م ۵۳۸ھ
(۹۲)عبد اللہ بن علی بغدادی (ابن شجری ) م ۵۴۲ھ
(۹۳)عبد اللہ بن احمد (ابن خشاب) م ۵۶۷ھ
(۹۴)ناصح الدین سعید (ابن دہان) م ۵۴۶ھ
(۹۵)ابو البرکات انباری (الانباری ) م ۵۷۷ھ
(۹۶)ابو الفتح مطرزی (عبد السید بن علی ) م ۶۱۰ھ
(۹۷)زید تاج الدین بن حسن (کندی ) م ۶۱۳ھ
(۹۸)ابو البقاء عبد اللہ الضریر بن حسین (عُکبری)م ۶۱۶ھ
(۹۹)احمد الضریر بن حسین (ابن خیاز) م ۶۳۷ھ
نحات مصر و شام (پانچویں صدی میں):
(۱۰۰)علی بن حسین بن ابراہیم (حوفی) م۴۳۰ھ
(۱۰۱)طاہر بن احمد مصری (ابن بابشاذ/آبشاذ) م ۴۶۹ھ
(۱۰۲)عبد اللہ بن برّی مصری (ابن برّی ) م ۵۳۸ھ
(۱۰۳)یحی بن زین الدین بن عبد المعطی زواوی (ابن معط)م ۶۲۸ھ
(۱۰۴)ابو البقاء یعیش موفق الدین یعیش (ابن یعیش) م ۶۴۳ھ
(۱۰۵)علی علم الدین محمد سخاوی (سخاوی) م ۶۴۳ھ
(۱۰۶)ابو عمر عثمان جمال الدین عمر کردیُّ الاصل(ابن حاجب)م ۶۴۶ھ
نحات اند لس و مغرب (افریقہ):
(۱۰۷)ابن عثمان نحوی مغربی (جودی) م ۱۹۸ھ
(۱۰۸)محمدبن اسماعیل مغربی (حمدون) م۲۰۰ھ
(۱۰۹)محمد بن موسی اندلس (اُ فُشْنیْقْ) م ۳۰۷ھ
(۱۱۰)محمد بن یحی رباحی اندلس (مہلبی) م ۳۵۷ھ
(۱۱۱)ابو بکر محمد بن حسن زبیدی (صاحب طبقات النحویین ) م ۳۷۹ھ
(۱۱۲)یوسف بن سلیمان (أعلم) م ۴۷۶ھ
(۱۱۳)عبد اللہ بن محمد السید (بطلیوسی) م ۵۲۱ھ
(۱۱۴)سلیمان بن محمد (ابن طرارہ ) م ۵۲۸ھ (۱۱۵)علی بن احمد (ابن باذش)م ۵۳۸ھ
(۱۱۶)محمد بن احمد بن ہشام لخمی (اللخمی) م ۵۷۰ھ
(۱۱۷)محمد بن احمد المشہور با لخدَبْ (ابن طاہر) م ۵۸۰ھ
(۱۱۸)عبدالرحمن بن عبداللہ (سہیلی) م ۵۸۳ھ
(۱۱۹)احمد بن عبدالرحمن لخمی قرطبی (ابن مضاء ) م ۵۹۲ھ
(۱۲۰)ابو موسی عیسی الجزولی (جُزولی) م ۶۰۵ھ
(۱۲۱)علی بن محمد علی حضرمی (ابن خروف) م ۶۱۰ھ
(۱۲۲)ابو علی عمر بن محمد المعروف بالشلوبینی م ۶۴۵ھ
(۱۲۳)ابو العباس احمد بن محمد (ابن حاج) م ۶۴۷ھ
علمائے نحو بعد سقوط بغداد (۶۵۶ھ):
نحات مشرق و اطراف :
(۱۲۴)حسین جمال الدین بن بدر بغدادی (ابن ایاز ) م ۶۸۱ھ
(۱۲۵)محمد بن حسن استرا آبادی مہاجرالی المدینة المنورة م ۶۸۸ھ
(۱۲۶)ابو عبید اللہ محمد بن سلیمان (کافیجی) م ۸۷۹ھ
(۱۲۷)ابو ضیاء الدین عبد الرحمن نو رالدین احمد نظام الدین (جامی)م ۹۱۱ھ
نحات اندلس و مغرب (افریقہ):
(۱۲۸)ابو محمد قاسم علم الدین لورقی (اندلسی) م ۶۶۱ھ
(۱۲۹)ابو الحسن علی بن مومن الشبیلی (ابن عصفور) م ۶۶۳ھ
(۱۳۰)ابو عبداللہ محمد جمال الدین بن عبداللہ الطائی(ابن مالک)م ۶۷۳ھ
(۱۳۱)ابو الحسن علی بن محمد اشبیلی (ابن الضائع) م ۶۸۰ھ
(۱۳۲)ابو الحسین عبیداللہ بن احمد اشبیلی (ابن ابی الربیع) م ۶۸۸ھ
(۱۳۳)ابو عبیداللہ محمد بن محمد صنہاجی المعروف (بابن آجروم) م ۷۲۳ھ
(۱۳۴)محمد اثیر الدین یوسف غرناطی (ابوحیان ) م ۷۴۵ھ
(۱۳۵)ابو اسحاق ابراہیم بن موسی لخمی غرناطی (شاطبی) م ۷۹۰ھ
نحات مصر و شام :
(۱)فی عصر الممالیک:
۶۴۸ھ میں مصر و شام میں ایوبیوں کے بعد ممالیک کے بر سراقتدارآنے کے بعد کا دور:
(۱۳۶)محمد بدرالدین بن محمد (ابن ناظم ) م ۶۸۶ھ
(۱۳۷)محمد بہاء الدین بن ابراہیم حلبی (ابن نحاس) م ۶۸۹ھ
(۱۳۸)حسن بن قاسم مصری (المرادی) م ۷۴۹ھ
(۱۳۹)عبداللہ جمال الدین بن یوسف انصاری (ابن ہشام )م ۷۶۱ھ
(۱۴۰)عبد اللہ بہاء الدین بن عبد الرحمن حلبی (ابن عقیل ) م ۷۶۹ھ
(۱۴۱)محمد شمس الدین بن عبد الرحمن (ابن صائغ) م ۷۷۶ھ
(۱۴۲)محمد محب الدین بن یوسف حلبی (ناظر الجیش) م ۷۷۸ھ
(۱۴۳)عزالدین بن ابی بکر بن عبد العزیز (ابن جماعة) م ۸۱۹ھ
(۱۴۴)محمد بدالدین بن ابی بکر المخزومی (دمامینی) م ۸۲۸ھ
(۱۴۵)احمد تقی الدین بن محمد المعروف (با لشُمُنِی) م ۸۷۲ھ
(۱۴۶)خالد زین الدین بن عبد اللہ (خالد ازہری ) م۹۰۵ھ
(۱۴۷)عبد الرحمن جلال الدین بن ابو بکر (سیوطی) م ۹۱۱ھ
(۱۴۸)علی نور الدین بن محمد (اشمونی) م ۹۳۹ھ
(۲)فی عصر الترک:
(۱۴۹)احمد شہاب الدین الصباغ (ابن قاسم عبّادی) م ۹۹۴ھ
(۱۵۰)ابو بکر بن شہاب الدین بن اسماعیل (شنواتی) م ۱۰۱۹ھ
(۱۵۱)عبد اللہ بن عبد الرحمن (دنوشری) م ۱۰۲۵ھ
(۱۵۲)یس بن زین الدین (یس) م ۱۰۶۱ھ
(۱۵۳)یوسف بن عالم م ۱۱۸۷ھ (۱۵۴)محمد بن علی (الصبان ) م ۱۲۰۶ھ
(۱۵۵)شیخ محمد (دسوقی) م ۱۲۳۰ھ (۱۵۶)شیخ حسن عطار (عطار)م۱۲۵۰ھ
(باقی آئندہ)
# # #
حواشی
(۱) فی کثیر من الکتب اللتی یخال فیہا التعرض لذالک، فما وقفنا علی مایشفی الغلة و ینیر السبیل، فلاح لنا بعد إنعام الفکرة و إطالة النظرة ان نجعل الصلة بین ہذہ المراحل و العلماء القائمین بامر ہذا الفن، إذ کان علی ایدیہم ما نقلہ من طور إلی آخر۔(شیخ احمد طنطاوی/نشاة النحو وتاریخ اشہر النحاة،ص:۳۵)دارالمعارف /قاہرہ۔
(۲) بغدادی مکتبہ فکر کے سلسلے میں یہ وضاحت کرنا ضروری معلوم ہوتا ہے کہ بصری، کوفی مکاتب فکر کے زوال کے دور میں چوں کہ بغداد علم و فن کا مرکز بنا ہوا تھا؛ اس لئے اہل علم بغداد کا رخ کرنے لگے۔ اس دور میں علم نحو نے بھی خوب ترقی کی اور نحوپر تصانیف بھی خاطر خواہ قابل ذکر اضافہ ہوا۔ نحات بغداد میں بھی عموماً دو رجحان تھے، کچھ پر بصری فکر کا غلبہ تھا، جب کہ کچھ کوفی مذہب پر عمل پیرا تھے۔ مثلاً درج ذیل نحات پر بصریت کا رنگ غالب تھا:زجاجی (م ۳۱۱ھ)،ابن السراج (م ۳۱۹ھ)،ابن درید (م ۳۲۱ھ)، ابوعلی صفار (م ۳۴۱ھ)، مبرمان (م ۳۴۵ھ)، نفطویہ (م ۳۲۳ھ)، ابن درستویہ (م ۳۴۷ھ)، قاضی ابو سعید سیرافی (م۳۴۷ھ)وغیرہ۔
بغدادیوں کی ایک جماعت کوفی مکتبِ فکر کی طرف مائل تھی، جیسے:حامض (م ۳۰۵ھ)، یزیدی (م ۳۱۰ھ)، ابن شقیر (م۳۱۷ھ)، ابو بکر ابن الانباری (م ۳۲۸ھ)۔
نحات بغداد میں ایسے حضرات بھی تھے جو دونوں مکاتبِ فکر کو جمع کرکے عمل کرتے تھے؛ ان کا جھکاؤ کسی ایک طرف نہیں تھا، جیسے:ابن خالویہ (م ۳۷۰ھ)، ابو علی الفارسی (م ۳۷۷ھ)، رمانی (م ۳۸۴ھ)، ابن جنی (م ۳۹۲ھ)، ربعی (م۴۲۰ھ)وغیرہ۔ (نشاة النحو وتاریخ اشہر النحاة،ص:۱۶۵-۱۸۴؛ مقدمہ اخبار النحویین البصریین،ص: ۷-۹؛وغیرہ)
ان سطور میں بغدادی مکتب فکر کو علیحدہ بیان نہیں کیاگیا ؛ بلکہ جس کا میلان بصریہ یا کوفیہ میں سے جس کی طرف تھااسے اسی کے تحت بیان کیا ہے؛ بغدادی مکتبِ فکر کے سلسلے میں مذکورہ وضاحت اس لئے بھی ضروری معلوم ہوئی۔
(۳) قاضی بغداد شیخ ابو سعیدسیرافی وغیرہ بھی بغدادیوں میں سے ہیں گر چہ بعض حضرات نے شیخ سیرافی کو بھی متاخرین میں شمار کیا ہے؛ لیکن اغلب یہ ہے کہ وہ متقدمین میں سے ہیں۔(نشاة النحو․․․․ ،ص:۱۹۲)
————————————————
دارالعلوم ، شمارہ1۔2، جلد: 106 ، جمادی الثانی۔رجب المرجب 1443ھ مطابق جنوری۔فروری 2022ء
٭ ٭ ٭