’’آہ! فدائے ملت‘‘ امیر الہند‏، صدرجمعیة علماء ہند

جناب حضرت مولانا سید اسعد مدنی صاحب علیہ الرحمة

اسعدِ مدنی فدائے ملت و دین و وطن ملتِ اسلامیہ کی آبرو ، فخرِ زمن

رہنمائے ملک و ملت ، قائدِ عہدِ رواں تھے امیر الہند ثانی ، نازشِ ہندوستاں

حضرتِ مدنی ، حسین احمد کے ابنِ ہوشمند بتکدانِ ہند پر ، اسلام کی ڈالی کمند

ان سے دو بالا رہی ہے عظمتِ دارالعلوم ان سے وابستہ رہی ہے ، نسبتِ دارالعلوم

صدر جمعیة رہے ، بہتر امیرِ کارواں رہتی دنیا تک ، دَرَخشاں ہوگا ، نقشِ جاوداں

اک مفکر ، اک مدبر ، ایک قومی رہنما کاروانِ اہلِ حق کا ، ایک سچا ، پیشوا

تھے وہ جمعیة کے صدرِ محترم چونتیس سال مشعلِ راہِ طریقت ، پیکرِ فضل وکمال

تھے وسیع الفکر ، عالی ظرف ، قائد ، باوقار صاحبِ فہم و فراست تھے مجاہد جاں نثار

دور اندیشی صفت تھی ، خوب تھا اظہارِ رائے مرگِ اسعد پر ، زمانہ کررہا ہے ہائے ہائے

وہ علمبردارِ حق تھے ، عہد کے رجلِ عظیم صاف گوئی کی علامت ، صاحبِ قلبِ سلیم

ایم پی ، تھے محترم ، وہ بے گماں اٹھارہ سال سرپرستِ قومِ مسلم ، رہنمائے خوش خصال

قومِ مسلم کی جہاں میں ، معتبر آواز تھے عشقِ حق میں تھے فنا، وہ اہلِ سوز و ساز تھے

وہ محاسن کے تھے پیکر ، اسعدِ ملت تھے وہ ہاں زمانے میں مثالی ، قائدِ ملت تھے وہ

عہدِ حاضر کے اکابر میں رہے وہ بے مثال کارنامے ، شیخِ اسعد کے ہوئے ہیں لازوال

سادگی ، سنجیدگی ، مجد و شرافت میں تھے طاق ان کی آراء ، پر مکمل ہورہا تھا ، اتفاق

تھے مریدوں کے مربّی ، رہبرِ اہلِ سلوک کررہے تھے، ہرکس وناکس سے وہ اچھا سلوک

رہبرائے معرفت تھے ، صاحبِ نسبت رہے عالمِ دیں ، متقی تھے ، مصلحِ امت رہے

دے گئے ہیں ، قومِ مسلم کو وہ تعلیمی شعور ہے دعا کہ : سرخرو ، ہوکر اٹھیں ، یومِ نُفور

وہ تھے گونا گوں ، صفاتِ فاضلہ سے متصف ان کی ہمدردی کے ہیں اپنے پرائے معترف

ان کی فرقت سے ہوا ، محصول ، رنجِ جانگُسِلْ مدتوں روتے رہیں گے ، یاد کرکے ، اہلِ دل

اسعدِ مدنی کے ہیں لاکھوں ، کروڑوں سوگوار جو کہ ، ہیں ان کی جدائی پر برابر اشکبار

سب دعا گو ہیں ، الٰہی : کر انہیں جنت عطا اور دے پسماندگوں کو ، جذبہٴ صبر و رضا

ان کی تربت کو بنادے ، نازشِ دارِ نعیم حشر میں ان کو عطا کر ، سایہٴ عرشِ عظیم

ہے ”ولی“ کی یہ دعا ! ہو جنت الماویٰ نصیب روز محشر ، اسعدِ# مدنی رہیں تیرے قریب

تیری تربت پر، زمانہ فاتحہ خوانی کرے

تا قیامت رحمتِ باری ، نگہبانی کرے

______________________________

ماہنامہ دارالعلوم ‏، شمارہ3، جلد: 90 ‏،صفر1427 ہجری مطابق مارچ2006ء