سوال: کیا فرماتے ہیں مفتیان عظام کہ ایک شخص سونے کی چھوٹی دلیاں بناکر رکھتا ہے اور ضرورت مندوں کو وہ دلیاں بازاری قیمت سے زیادہ سے ادھار میں فروخت کرتا ہے کہ اب یہ لے جائو بعد میں ایک مہینے کے بعد اتنے پیسے ادا کرنا اس طرح مستقل طور پر قرض سے دلیاں بیچنا کیسا ہے؟ براہ کرم رہنمائی فرمائیں۔
المستفتی: محمد زبیر مہوبی
بسم اللہ الرحمن الرحیم
الجواب بعون مُلْہِمِ الصواب: سوال کے آخری جملے سے معلوم ہوتا ہے کہ وہ شخص سونے کی دلیاں ضرورت مندوں کو بہ طور قرض دیتا ہے اور دیتے وقت اس کی قیمت زیادہ لگاتا ہے اور واپس لیتے وقت وہی سونا کم قیمت پر واپس لے لیتا ہے۔ اگر معاملے کی نوعیت اسی طرح ہے تو یہ جائز نہیں اوراگر یہ صورت مراد ہے کہ وہ شخص سونے کی دلیاں ادھار بیچتا ہے اور ادھار بیچنے کی وجہ سے اس کی قیمت بازاری قیمت سے زیادہ لگاتا ہے اور خریدار مجلس عقد میں سونے پر قبضہ کرلیتا ہے اور پھر ایک مہینے کے بعد خریدار سونے کی وہ قیمت ادا کردیتا ہے جو عقد کے وقت طے ہوئی تھی، بعینہٖ وہ سونا واپس نہیں کرتا تو اس طریقے پر خریدوفروخت کا معاملہ جائز ہے اور اگر مجلس عقد میں احدالبدلین پر قبضہ نہیں ہوتاتو بھی یہ معاملہ جائز نہیں۔ لم یشترط فی بیع الفلوس بالدراہم أو الدنانیر قبض البدلین قبل الافتراق ویکتفی بقبض أحد البدلین۔ (الہندیہ ۳/۲۱۷) (شامی، زکریا، ۷/۵۲۲) فقط واللہ أعلم
| الجواب صحیح:حبیب الرحمن عفا اللہ عنہ، محمود حسن بلند شہری غفرلہ مفتیانِ دارالافتاء، دارالعلوم دیوبند | وقار علی غفرلہٗ دارالافتاء دارالعلوم دیوبند ۲۳؍۴؍۱۴۴۰ھ=۳۱؍۱۲؍۲۰۱۸ء |
==============================
سوال: اگر کوئی مومن اللہ کی قسم کھائے کہ گوشت نہیں کھائے گا زندگی بھر؛ لیکن وہ پھر مچھلی کھائے تو کیااس کی قسم ٹوٹ جائے گی؟ اور اسے کفارہ ادا کرنا پڑے گا؟
بسم اللہ الرحمن الرحیم
الجواب بعون مُلْہِمِ الصواب: صورت مسئولہ میںاگر حالف (قسم کھانے والے شخص) کی نیت گوشت نہ کھانے سے مچھلی نہ کھانے کی بھی تھی یا حالف کے عُرف میں گوشت (لحم) کا اطلاق مچھلی (سمک) پر بھی ہوتا ہے تو ایسی صورت میں مچھلی کھانے سے قسم ٹوٹ جائے گی اور کفارہ قسم ادا کرنا پڑے گا؛ ورنہ نہیں۔ وإنْ حلف لا یأکل لحمًا فأيّ لحم أکل من جمع الحیوانات غیر السمک حنث سواء أکل طبیخًا أو مشویًا أو قدیدًا وسواء کان حلالاً أو حرامًا، فأما السمک وما یعیش فی الماء فلا یحنث، وإن نوی السمک، یحنث، قالوا لو کان الحالف خوارزمیًا فأکل السمک، یحنث لأنہم یسمون لحمًا۔ (ہندیہ ۲/۹۰ مکتبہ فیصل) فقط واللہ أعلم
| الجواب صحیح:حبیب الرحمن عفا اللہ عنہ، محمود حسن بلند شہری غفرلہ مفتیانِ دارالافتاء، دارالعلوم دیوبند | وقار علی غفرلہٗ دارالافتاء دارالعلوم دیوبند ۱۶؍۴؍۱۴۴۰ھ |
——————————————–
دارالعلوم ، شمارہ : 2، جلد:103، جمادی الاول – جمادی الثانی 1440 مطابق فروری 2019ء
٭ ٭ ٭